~अर्जुन पराजुली~
आँगनमा बसेर छिमेकीले सुन्ने गरी
धारामा पानी आएन किन भन्नु पर्यो?!
रिनको ब्याज कति लाग्यो भन्दै
दिनका दिन औँला भाँचेर गन्नु किन पर्यो?!
बिरामी हुँदा सिटामोल पाइएन
पाइएन त पाइएन, पाइएन भन्नु किन पर्यो?!
खेती लाउने बेलामा मल पाईंदैन
सबैलाई थाहा छ, बढी जान्ने बन्न् किन पर्यो?!
नेताले आफन्तलाई बनायो त बनायो
आफैँले बनाएको नेता होइन? बनायो भन्नु किन पर्यो?!
देशभन्दा अग्लो भ्युटावर नै बनिसकेपछि
देश बन्नु किन पर्यो?!
