~अनमोल मणि~
त्यो जून
तिमीले हेर्दा तिमीजस्तो हुन्छ
एक्लो एकान्ते
बादल जस्तै उड्छ सम्झना
र पानी जस्तै दर्किछ पीडा
तिमी भित्र पनि म भित्र पनि,
उस्तै छ आकाश
तिम्रै मन जस्तो-चौडा
तिम्रै अनुहार जस्तो चम्किन्छन् हररात ताराहरू
र लजाउँछन् एक अर्कासँग
त्यसैले त्यो जून
तिमीले हेर्दा मजस्तै हुन्छ
र मैले हेर्दा तिमीजस्तै हुन्छ
बैँशको गल्छेँडामा उभिएर सोचिरहेछन्
कुमारीहरू
साँच्चै त्यो जून
प्रेमीजस्तो हुन्छ कि प्रेमिका जस्तो ?
