~अर्जुन पराजुली~
लय : सारङ्गीको तारले मेरो मनको गीत गाउँछ
भ्रष्टाचारको नोटले मेरो मनको गीत गाउँछ
बिर्सु भन्छु सम्झना झन् झम्टीझम्टी आउँछ
चिरञ्जीवी भएस् भनी आशिष ठोक्थे बाले
जहाँ भेट्थे च्याप्प समाई ढोग्थे ससुराले
आज बाले ससुराले थु थु गरी थुक्छन्
मैले पाल्या कुकुरले नि मै मोरालाई भुक्छन्
आज आफ्नै गीत पनि घुक्याउँछ मात्रै
लोक्कल ठर्राले नि मुखमा तुक्र्याउँछ मात्रै
घर बनाउने इँटा सिमेन्ट फलामका डण्डी
तँछाड मछाड गर्दै आउँथे टडकमा झुण्डी
आज सिमेन्ट फलाम घरै भत्काइ जान्छु भन्छन्
इँटा पनि पर्खी बुढा तँलाई हान्छु भन्छन् ।
भ्रष्टाचारको नोटले मेरो मनको गीत गाउँछ
बिर्सु भन्छु सम्झना झन् झम्टीझम्टी आउँछ ।
(स्रोत : फित्कौली डट कम)
