~रमेश खकुरेल~
सिस्नेरीमा बाढी आयो
बालाजुमा भैंसी बगायो
डिल्ली बजार म्याउँ बोल्यो
बानेश्वरमा मुसो हरायो ।
चौंरी पाल्ने खर्क छैन जरायोलाई घारी
फड्के बस्यो आफ्नै ठाउँमा खोलो पुग्यो पारि
वारि बगर पारि खेत
यस्तो बिजोग कल्ले गरायो ।
जेठो हली कान्छो रोपार यौटै डाडु पन्यु
यौटा घरमा धानको कुन्यु अर्को घरमा उन्युँ
तँलाई उन्युँ मलाई कुन्युँ
बण्डा गर्ने लण्ठै हरायो ।
द्यौता बस्ने सिंहासनमा छुचुन्द्राको ताँती
जस्तो द्यौता उस्तै पूजा सिस्नो तितेपाती
पानी छैन पँधेरी
कोकाकोला बियर चढायो ।
-कमलपोखरी, काठमाडौं
