~चिरञ्जीवी ढकाल~
अादरणीय रसिक प्रधानमन्त्री खड्गप्रसाद अाेलीद्वारा देशवासीका नाममा सम्बाेधन
छन्द : उपजाति
अाेली उवाच –
कार्की र सार्कीहरु देशवासी !
बाेटे र भाेटे ! मछुवा र घाँसी !
कामी र धामी ! अनि लिम्बु राई
च्यामे र पाेडे ! चुरेटा, दमाई !!
उपाध्य जैसी “टपरे” कुमाई !
टुप्पी ठडाई सुन दाजुभाइ !!
छेत्री र खत्री ! ठकुरी र घर्ती !
सुन्नू सबैले अब दिव्य अर्ति ।
नेपालकाे हुँ, म प्रधानमन्त्री
कम्निष्टवादी अनि लाेकतन्त्री ।
विकास गर्ने सपना छ मेराे
चढून् यहाँका जनता “पजेराे”
नेपालका “लाेकल” व्यक्तिलाई
मात्रै “छ” घन्टा “जब” ( job) मा लगाई ।।
“तलब्” दिने मासिक पाँच लाख
“सर्कार”काे नीति छ “जेठ”बाट !!
हावा चलाई बिजुली निकाल्छु
पाईप जाेडेर म ग्याँस बाल्छु !!
कि चन्द्र-सुर्जे भुइँमै म झारूँ????
दिवा र रात्री झलमल्ल पारूँ ।।
बुर्लुक्क उफ्रेर हिमाल जाउँ,
टुप्पाे तिखारी धह्ररा(धरहरा) बनाउँ
हाम्रै महासागर हाे प्रशान्त !
नेपालकाे पानिजहाज चल्छ ।।
पहाड जाेतेर म ‘सम्म’ पार्छू
चारै सिमा तार लगाइ बार्छू ।
मधेशमा स्याउ फलाउनेछू
हिमालमा खर्बुज लाउनेछू !!
मेची र कालीबिच रेल हाल्छु,
याे काम अर्काे महिना म थाल्छु,
कुदाउनू पर्छ बुलेट रेल
यस्ताे छ मेराे सपना अचेल ।।
किसान ! तिम्रो सुनकाे मदानी,
हिरा र माेतीहरुकाे सिरानी !!
हुनेछ छिट्टै, सुन बात भाइ!
“फ्री” हुन्छ देशैभर वाईफाई ।।
नेपाल यस्ताे प्रविधी बनाअाेस्,
भैंसी बियाअाेस्, तर बाच्छि पाअाेस्,
जमीनकाे स्टेसन अार्यघाट
स्वर्गै पुगूँ केवलकारबाट ।।
अन्टार्टिकामा अब खेति गर्छु,
काेदाे,मकै,फापर,ताेरि छर्छु ।।
यस्ताे अनाैठाे बिरुवा बनाऊँ,
अलैँचि राेपी अदुवा फलाऊँ
म सूर्यमा गैकन राेटि सेक्छु,
र चन्द्रमा गैकन पाउ टेक्छु,
किन्छू घडेरी म त चन्द्रमामा !!
घुमाउनेछू ससुरा र मामा ।।
उद्योग खाेलेर यहाँ हजार,
युराेपका ल्याउँछु कामदार !!
अमेरिकाका जनता नि अाउन्,
पुग्ने गरेरै रुपियाँ कमाउन् ।।
“पढ्ने भिषा” चैँ सजिलो बनाउँ,
अष्ट्रेलियाबाट युवा मगाउँ !!
नेपालकाे फेर्दछु मान-चित्र !
बन्नेछ यस्ताे दुइ वर्षभित्र !!
छन्द – उपजाति
SSI SSI ISI SS
ISI SSI ISI SS
चिरञ्जीवी ढकाल,
स्याङ्जा (युएई)
जेठ ५ २०७३
(स्रोत : रचनाकारको फेसबुकबाट सभार)
