~गोवर्धन पूजा~
हिउँको एक झोक्का पनि
खप्न नसकेर
झरे म्याप्पलका पातहरू
छोडेर आफन्तलाई
तोडेर नाता सम्बन्ध
सुटुक्क समुद्र भेट्न बसाई सरेको
खहरेको जीवन जस्तै
सरे म्याप्पलका पातहरू
आफैसँग लजाएर
बाधासँग डराएर
सुटुक्क सम्झौता-पत्रमा हस्ताछेर गर्ने
हारेको जुवाडे जस्तै
कति कमजोर
कति नाजुक
कति निरीह
म्याप्पलका पातहरू
ठ्याक्कै मजस्तै
दोस्रो दर्जाको नागरिक |
७,फाल्गुन, २०६७
चितवन,
हाल:- बोस्टन, अमेरिका
(स्रोत : नेपालीडायस्पोरा डट कम – अंक १, असार २०६८, जुलाइ २०११)
