~राजव~
प्रिय मार्क्स
तिम्रा तस्वीरहरुलाई अहिले
गधा र बाँदरहरुले घेरिरहेछन्
मैले तिम्रो तस्वीरमा
माल्यार्पण गर्न सकिन
गधा र बाँदरहरुको घेराबाट बाहिर
अलि टाढा उभिएर
प्रिय मार्क्स
म तिम्रो
संकटग्रस्त तस्विर टोलाइरहेछु
कुनै पनि बेला
ती बाँदरहरु
गधाहरुको ढाढ चढ्ने छन्
र च्यात्ने छन् तिमीलाई
म त एउटा निहत्था
गरिब मान्छे हुँ
प्रिय मार्क्स
जो तिमीले युगौंअगाडि
देखाएको डकुमेन्ट्री हेरेर
सुख पाउने प्रतीक्षामा छ
त्यसकारण प्रिय मार्क्स
मलाई अहिले
बाँदर र गधाहरुको घेराभित्र रहेको
तिम्रो तस्वीरको चिन्ता छ
आफूलाई बचाउ
प्रिय मार्क्स
तिमी बाँच्यौ भने
मेरो आशा पनि बाँचिरहन्छ
तिम्रो तस्विर पनि बाँचिरहन्छ
प्रिय मार्क्स
तिमी पर्वत हौ
र म सिसिफस
( समय, असोज १७, २०६४ को अङ्कमा प्रकाशित )
