~उत्तम कृष्ण मज्गैंया~
नववर्ष निकै सुखसंग बितोस्
तकरार विवाद कुनै नरहोस्
भय कष्टहरू सब दूर रहून्
मनका दुविधा अनि भ्रान्ति हटून् !
युगकै प्रिय गीत बजून् लयमा
जयकार पुकार रहोस् जगमा
रचनात्मक भै शुभ काम बनोस्
सब सार्थक भै शुभ नाम रहोस् !
नमरून् अब क्रान्ति-सपूतहरू
नमरून् अब सर्जक-दूतहरू
अब युद्ध कतै नचलोस् बलले
अब यो धरती नभिजोस् खुनले !
न त उच्च रहून् न त नीच रहून्
निमुखा बलिया सब एक रहून्
नरहोस् अब भोक र शोषण यो
सब आपसमा मिलि काम गरून् !
कविको कविता सुरगान बनोस्
अब चिन्तन एक महान बनोस्
अब मातिनुहुन्न कुनै बलले
अब नासिनुहुन्न कुनै छलले !
वसुधाभरिको सबको जय होस्
न त जीवन बाँच्न कुनै भय होस्
शुभ कर्म गरून् सब वर्ग मिली
अब भूतल होस् नव स्वर्गसरि !
(स्रोत : रचनाकारको फेसबुकबाट सभार)
