~डा. ऋषि बस्ताकोटी~
हिजो रावण थियो, राम बनायौ आज,
अँध्यारो दिनेलाई घाम बनायौ आज,
हनुमानजी पहाड त बोक्यौ उसैका लागि-
तर आफ्नै भने बदनाम बनायौ आज ।
*****************************
सम्पत्तिको कुरा गर्छौ, मैले त भनिदिएँ जे जति छन्,
सर्वहाराको अरु के नै हुन्छ र, मात्र एक श्रीमती छन्,
यता नूनको गफ गरियो, उता उनको सुन जोडियो –
आफ्नो त केही छैन अझै, सबै उनैको हो, खै कति छन् !
*****************************
हिजो नरभक्षी बाघको दाह्राको कुरा गरे,
दुनिया झुक्कियो जव मीठो नाराको कुरा गरे,
नाङ्गो बादशाहलाइ नाङ्गै भन्नुपर्यो आज –
आखिर तिनले उही पुरानै पाराको कुरा गरे ।
*****************************
कहिले कान छाम्नै बिर्सेर हामी हल्लामै दलबलका कुरा गर्छौं,
कहिले यसका र उसका जर्सी लगाउँदै फुटबलका कुरा गर्छौं
कुरा गर्न त कसले सक्छ र हामीलाई, कुरै त हो जे भए पनि-
योजनाविहिन सपना बाँडेर आखिर समृद्ध र सवलका कुरा गर्छौं !
*****************************
बाले सुनाएको पुरानो गीत घरिघरि गाएर, म गायक बन्न सक्तिन,
उही पुरानै पाराले ज्यान हल्लाएर दिनदिनै, म नायक बन्न सक्तिन,
युगको पाइला रोक्ने कि क्षितिजपारीको भविष्य देख्ने, मेरै हो रोजाइ-
नयाँ सोच, नयाँ खोजबिना पछि लागेर भो अब सहायक बन्न सक्तिन ।
*****************************
कि त अनुमानले चलाउँछ मेरो देश,
कि त हनुमानले चलाउँछ मेरो देश,
रिसराग छोडेर बुद्धिविवेक सहित –
खै कहिले स्वाभिमानले चलाउँछ मेरो देश !
*****************************
फले पनि फलोस्, हित मेरै हुन्छ,
ढले पनि ढलोस्, जीत मेरै हुन्छ,
खरानीमै रमाउँछु, फेरि आगो सल्काएर-
बले पनि बलोस्, गीत मेरै हुन्छ ।
*****************************
पहिलो कुरो त नेपालीले नेपालीलाई नेपाली देख्नुपर्यो ।
आफूलाई मात्रै वीर होइन, अरुलाई पनि बलशाली देख्नुपर्यो ।
बिभाजनको रेखा मेटेर हुन्छ कि, समानताको सुत्र भेटेर हुन्छ-
‘विविधतामा एकता, नेपालीको सार्थकता’ यसपाली देख्नुपर्यो ।
*****************************
आफैँले आफैँलाई पद बनायौँ,
खादा मालाले गदगद बनायौंं,
स्वघोषित समाजसेवी बनेर –
संस्कार भने निकै दुखद बनायौँ ।
*****************************
हिजो उनीसँग तस्वीर खिच्यौ, आज यिनीसँग फोटो देखिंदैछ,
उचाइ बढाउन जे गर कोशिस, चरित्र भने छोटो देखिँदैछ,
हावा चलेतिर बहकिन त सजिलै थियो यात्रा, तर पुगिन्छ कहाँ-
सफेद बस्त्रले ढाकिए पनि आखिर अनुहार खोटो देखिंदैछ ।
(स्रोत : साझापोस्ट डट कम)
