~विमला तुम्खेवा~
तिम्रो आँखामा देखिएको सपना जस्तो
मसँग केही छैन
जीवनको उमंग
छन् त
खालि यी नीला सागर छन्
जसमा सलबलाइरहेछन् अनेक दुःखहरु
यो विरही क्षितिज छ
र केही उदास गीतहरु छन्
जो तिम्रो सम्झनामा अनायासै आइदिन्छ
अब,
दोहोरिने छैन कहिल्यै पृथ्वीमा
एउटा यस्तो सत्य
तिम्रो आँखा जस्तै सुन्दर
तिम्रो मुस्कान जस्तै शालीनता
हिँडेर कहिल्यै नसकिने यी बाटाहरु जस्तै
देखेर कहिल्यै नसकिने यी सपनाहरु जस्तै
एक्लै मुस्कुराइरहेकी तिमी
थाहा छ तिमीलाई ?
तर,
जीवन जस्तै छली तिम्रो मुस्कान मलाई औधी मन पर्छ ।
(स्रोत : संस्मरण एउटा बूढो रुखको’ संग्रहबाट सभार)
