~भीष्म उप्रेती~
म यहीँ छु
तर तिमी छैनौ ।
मैले निरन्तर माया गरेको
अगाध श्रद्धा गरेको
अनन्त तपस्या गरेको
तिमी,
मेरो स्वतन्त्रता
मेरो लक्ष्य
मेरो गन्तव्य
मेरो प्रतिबद्धता ।
म भने छु
तर तिमी छैनौ ।
तिमी बिना म कसरी छु ?
कसरी पूर्ण छु ?
कसरी ज्योतिर्मय छु ?
म पूर्ण हुन चाहन्छु
ज्योर्तिमय हुन चाहन्छु ।
म उठ्छु
अघि बढ्छु
लड्छु अवरोधहरूसँग
म
तिमी सहितको भइछाड्ने छु ।
शनिश्चरे, झापा
हालः काठमाडौं
(स्रोत : नेपालीकविता डट कम)
