~प्रकाश सापकोटा~
मलाई कसैले सोधे
एमसीसीको पूर्ण रुप
म भन्छु- मलाई चिन्ता छ
सहयोगको सहनाई बजाउँदै
शान्त सहरमा साम्राज्य जमाउन,
स्वाभिमान र स्व-अस्तित्वमा
सुस्त-सुस्तरी अंकुश लगाउन
स्लो पोइजनको सुइ
सोझ्याएको पो हो कि !
छपन्न अर्बले छोपेर
छक्याई-छक्याई छातिमा छुरा हान्दै
छेकेर स्वतन्त्रताका बाटाहरू
छिमलेर खुशिका हाँगाहरू
छेपारोको रङ्ग लिएर
छिरेको पो हो कि !
बहसका बिषय बनेका
बिबादका बुँदाहरू बिर्सेर
बुनिएका तानाबानामा बेरिँदै,
बहकिँदै — बहकाउँदै
ब्यर्थको बठ्याइँ गर्नुको साटो
बेलैमा बुद्धि पुर्याएर
बदनियतपूर्ण बाटाहरू बन्द नगरे
बाह्य बक्रदृष्टि अनि बलमिच्याइँले
बित्यासमा पार्ने पो हो कि !
एमसीसी: मलाई चिन्ता छ
(स्रोत : रचनाकार स्वयंले ‘नयाँ रचना पठाउनुहोस्‘ बाट पठाईएको । )
