कविता : जमिन

~प्रमोद धिताल~

आकाश नाप्दै उड्ने अन्तरिक्ष यान
जमिनको आशीर्वाद लिएरै उड्छ
र फर्किन्छ फेरि जमिनतिरै

हरेक शिखर आरोहणहरु
सुरु हुन्छन् जमिनबाटै
समापन हुन्छन् फेरि जमिनमै
जतिसुकै बेगवान गतिमा कुदिरहेका मानिसहरु
चुमेर रोमाञ्चक गन्तव्यहरु
टेकेरै दौडिन्छन् जमिन
सुस्ताउछन् फेरि जमिनमै

जति आकाश चुम्दै जान्छ वृक्ष
त्यति गहिरिदैं जान्छन् वृक्षका जराहरु
जमिनको गहिराइतिरै

– दाङ

(स्रोत : शब्दशिखा डट कम)