~आनन्द श्रेष्ठ~
धुवाँ देखिन्छ आगो देखिन्न कस्तो अचम्म !
मनमा लुकेको कालो देखिन्न कस्तो अचम्म !
गाउँ खाली छ शहर शून्य भो युवा भेटिन्न
जता हेरे नि पाको देखिन्न कस्तो अचम्म !
आज पुरानो मेरो शहरको नक्सा जाँच्दै छु
नक्साबमोजिम बाटो देखिन्न कस्तो अचम्म !
माया गर्नेको आँखै टालिन्छ जस्तो लाग्दछ
बाङ्गो सोचिन्न खाल्डो देखिन्न कस्तो अचम्म !
डाँडाकाँडा ‘थ्यो सम्झी ल्याउँदा हुन्छ रमाइलो
याद अल्झेको पाखो देखिन्न कस्तो अचम्म !
