~हीरारत्न श्रीशा~
मानिस ठूलो जातले हुन्छ दिलले कहाँ हुन्छ यहाँ ?
रेटी रेटी निस्किएको मिठो कहाँ धुन छ यहाँ ?
एक वर्गलाई दबाइरहे उच्च ठान्दो रैछ मान्छे
घमन्डले नै शिखर छुन्छ, विचारले कहाँ छुन्छ यहाँ ?
छोइछिटो गर्नेहरु क्रान्ति गर्ने कुरा गर्छन्
पिल्सीपिल्सी बसेपछि आवाज कहाँ सुन्छ यहाँ ?
उसकै कला पसिनाले यो समाजलाई रंग्याउँछ
जसले समाज सजाउँछ उसको कहाँ गुन छ यहाँ ?
मलाई जस्तै तिमीलाई व्यवहार गरेपछि थाहा हुन्थ्यो
मानव धर्म नबुझ्नेको मन कहाँ रुन्छ यहाँ ?
मानव सबै समान छन् तर उनको नजरमा
गैरदलित र दलितको समान कहाँ खुन छ यहाँ ?
– अर्घाखाँची (हाल कुवेत)
(स्रोत : हाँक विक्ली – वर्ष ३०, अंक ३५ – July 17, 2013 – २०७० श्रावण २ गते, बुधबार)
