~निश्चल क्षेत्री~
हो मलाई त्रिपालको बास मन पर्छ
नमिठै होस् सामुहिक गास मन पर्छ ।
त्राही त्राही दोधारे यो जीवनभन्दा
मृत्युकै होस् सन्तुष्टिको सास मन पर्छ ।
प्राकृतिक बिपत्ति यो टार्न कसले सक्नु
देशका लागि जुट्नेहरू खास मन पर्छ ।
पूर्वदेखि पश्चिमसम्म व्यथा उस्तै उस्तै
तर पनि दुष्टजनहरूको लास मन पर्छ ।
बैरीको सहयोगप्रति शङ्का सबैलाई
ती स्वार्थी सबैको उठिबास मन पर्छ ।
बिपदको घडीमा एकताको सन्देस दिउँ
फुटाउन खोज्नेहरूको सर्वनास मन पर्छ ।
हो मलाई त्रिपालको बास मन पर्छ
नमिठै होस् सामुहिक गास मन पर्छ ।
(पाल्पा)
(स्रोत : हाँक विक्ली – वर्ष ३२, अङ्क २६ – May 28, 2015 – २०७२ जेष्ठ १३ गते, बुधबार)
