~रीता ताम्राकार~
मेरो कथा शून्यशून्य ठाउँहरूमा खोज ।
मेरो व्यथा चह-याउने घाउहरूमा खोज ।
चुँडिएको चङ्गाझैँ म बेठेगान उडिरहेँ ,
मेरो ठेगाना निर्जननिर्जन गाउँहरूमा खोज ।
भत्किएको मन्दिरजस्तो आस्थाभन्दा पर,
मलाई खोज्दा बिर्सिएका पाउहरूमा खोज ।
बाँसुरीझैँ चोट बोकी धेरै गीत गाएथेँ,
अब मौन सागरमाथि नाउहरूमा खोज ।
फूल छोडेँ जून छोडेँ उज्यालो सब छोडेँ,
अब मलाई नियतिका दाउहरूमा खोज ।
(स्रोत : साहित्यसरिता – अङ्क २ वर्ष-२ साउन-भदौ-असोज-२०६२)
