~मनु ब्राजाकी~
नयाँ नेपाल जाने थोत्रो बस छुटेछ
भ्रष्टाचारले मगन्तेको पैसो लुटेछ ।
पूरा खान ‘प्रभु’लाई भोग लगायो
थोते बूढी आमालाई मकै भुटेछ ।
ऐना हेर्न डराउँछन् आज नेपाली
हिमालको भित्ते ऐना पनि फुटेछ ।
छोरी कुटी बुहारीलाई तर्साउनेले
आमालाई कुट्नुसम्म आज कुटेछ ।
लुट्या देश आपस्तमा भागबण्डा भो
अनि पो त दलहरू आज जुटेछ ।
यो देशको बालीनाली कस्तो हुने हो ?
पानी पर्नुसट्टा असिनाले चुटेछ ।
-सैँबु, भैँसेपाटी, ललितपुर
