~हीराछवि श्रीशा~
बाघ गयो, स्याल आयो फरक के नै छ र
भाईले छोड्यो दाईले खायो फरक के नै छ र
पहिले पनि भएकै थियो चुनाव संविधानसभाको
षडयन्त्र फेरि छायो फरक के नै छ र
देश बिगार्ने,जनता लुट्ने उनै नेता आए
बाँदरले लिस्नु पायो फरक के नै छ र
हलो अडकाई गोरू चुटे पहिले पनि यहाँ
धाँधलीको आरोप लायो फरक के नै छ र
जमानामा जनवादी गीत गाउँदै हिंड्थे
अहिले जातिवादी गीत गायो फरक के नै छ र
कोही जातिवादी यहाँ कोही राष्ट्रघाती
कोही भारततिर धायो फरक के नै छ र
–वाङला, अर्घाखाँची (हाल कुवेत)
(स्रोत : हाँक विक्ली – वर्ष ३१, अंक ५ – Dec. 18, 2013 – २०७० पौष ३ गते, बुधबार)
