~राजेन्द्र शलभ~
मेरो झ्यालनिर आएर जून
मलाई सधैं माया गर्न सिकाउंछ
म भित्र उत्साह र प्रेम भरेर जान्छ ।
बिहानै मेरो देशका शासकहरू
म भित्र घ्रिणा भरेर जान्छ्न
बिस्तारै म भित्र पनि
स्वार्थको बिऊ रोप्न आतुर छ्न
र, म पनि अरूलाई माया गर्नुभन्दा
अरुले माया नगरेको गुनासो गर्छु
मलाई आफ़ैसंग डर लाग्न थालेको छ ।
म प्रेम बांड्न चाहन्छु
म जूनको कुरा सुन्न र मान्न चाहन्छु
मलाई मेरा शासकहरूभन्दा
जून नै बडी प्रिय छ ।
थाहा छैन,
जून कतिन्जेल मेरो झ्यालमा आइरहन्छ
र म स्नेह बांडी रहन्छु
अचेल शासनका काला बादलहरू
आकाशभरि मडारिन थालेका छ्न ।
