~राजव~
बाज पनि मुग्ध छ
यो बिहान
आफ्ना नङ्ग्राहरू
हाँगोमा गाडेर
मोहित
महसुस गर्दै छ
आफ्ना पखेटाका काप–कापमा
चिसो सिरेटो
ऊ अहिले आहारका लागि सक्रिय छैन
छ उत्तिसको हाँगामा
स्थिर/आनन्दित
त्यस कारण
चराहरू
अहिले निमग्न उडिरहेछन्
खबर छैन उनीहरूलाई
नजिकैको यो बाजको
जो लालायित सुदूर देशको पर्यटकझैँ
हरिया पहाडपछाडिको अर्ध–उदित सूर्य हेर्दै छ
बिहानको यो कलिलो मोहकता
हट्नेबित्तिकै
फेरि झम्टनेछ ऊ
चराहरू
वास्तवमा
क्रूरको सौन्दर्यप्रेम
स्थायी हुँदैन
