~गोविन्ददेव आचार्य~
छन्द :- भुजङ्गप्रयात
तपस्या गरी बैँस पाइन्न नानी
गुफाभित्र तारा चियाइन्न नानी ।।
तिमी ठान्दछ्यौ दृष्टिमा मिल्छ माया
दुना-थाल हेरी अघाइन्न नानी ।।
लगाई विदेशी दुई इन्च जालो
ध्वजा, गर्व, लज्जा टिकाइन्न नानी ।।
इरादा छ तिम्रो फसाएर भाग्ने
मुसाबाट हात्ती नचाइन्न नानी ।।
बनोस् जिन्दगी यो महा-पुण्यशाला
मिठो गाँस चाख्दै बिताइन्न नानी ।।
परी नाच्न आऊन् कि “गोविन्द” आऊन्
झुटो रूप हेरी रमाइन्न नानी ।।
।ऽऽ ।ऽऽ ।ऽऽ ।ऽऽ
– नुवाकोट ।
(स्रोत : रचनाकारको फेसबुकबाट सभार)
