~विजय महर्जन ‘श्रीजय’~
।। अनुभूती १ ।।
निष्पट अन्धकार चिर्दै
अनन्त उज्यालो छर्दै
निरन्तर आफू जल्दै
हावाहुरी झेल्दै
छोटिदो आयूसँग
पालाको दियोको,
अनवरत जीवन संघर्ष।
।। अनुभूती २ ।।
राता पहेलाँ रङ्गका टीका
थरी थरिका फूलहरु
फलफूलका प्रसाद
निर्मल जलको शुध्दता
माटोको पालामा कपासको दियो
आहा! त्यो मझेरीमा लिपेको,
रातो माटोको सुगन्ध
संस्कृतिको जगेर्ना।
।। अनुभूती ३ ।।
फूलको सुगन्ध मोहक
घन्टीको माधुर्य अपूर्व
दियोको ज्योतीपुन्ज मनोहर
भजनको गान
आशिर्बादको आदान-प्रदान
शान्त मन।
परिकारका स्वाद बेजोड
पहिरनको पहिचान सुन्दर
घरको मूल्य अनमोल
परिवारको माया न्यानो
आफ्नोपनको आभाष
बाँच्ने आधार।
जय, सिड्नीबाट
November 3, 2008
(स्रोत : माइ संसार डट कम)
