~हुसैन खाँ~
धरामा सुमेरू छ नेपाल मेरो
यही नै दिलैको सुसञ्जाल मेरो
तरार्इ-पहाडी-हिमाली स्वरूप
मिलेरै बनेको छ मायालु रूप
।१।
कहीँ देउराली कहीँ दून-डाँडा
यहाँ भीरपाखा रहेछन् हजार
कतै लेक-बेसी कतै खर्च-टार
जडीबूटिकै हो ठुलो नै भँडार
।२।
धरामा छ अग्लो त एभ्रेष्ट मेरो
स्वदेशी-विदेशी सबैमा छ प्यारो
विनोदी रहेछन् यहाँका हिमाल
र छन् आत्मभित्रै निकै कुण्ड-ताल
।३।
वनैमा फुल्यो फूल रङ्गी-विरङ्गी
सबै जीव-जन्तू बने सङ्ग-सङ्गी
कतै जङ्गलैमा फुलेछन् पलाँस
कतै लेकमा मग्मगाए गुराँस
।४।
ठुला निर्झी कालि-कर्णालि-कोशी
बगे नागबेली हुँदै लेक-बेसी
महाकालि-मेची रहेछन् सिमाना
बगेछन् उठाएर मीठो तराना
।५।
रचना मिति : २०६२।०४।२५
हूसैन खाँ
गणेशमार्ग नारायणगढ चितवन ।
नोटः यो रचना पल्लव साहित्य प्रतिष्ठानबाट प्रकाशित मरूद्यान कवितासङ्ग्रह– २०६५, को पेज नं. २५ बाट साभार गरिएको हो ।
(स्रोत : पल्लव साहित्य प्रतिष्ठान )
