~लेख कार्की~
आमा भन्छिन् टेर्नै छोड्यो अटेरी भो अब
बाबा भन्छन् तेरो छोरो तन्नेरी भो अब ।
विज्ञानले त संसारनै साँघुर्याई दियो हेर्नुस
नेपाललाई कतार पनि मझेरी भो अब ।
नेता ज्यूले घरैबाट गाडी बाटो ल्याए
बाँदर नाच्ने पाखो पनि घडेरी भो अब ।
हिजोसम्म झिलिमिली स्वर्ग थियो सहर
भूकम्पका आँखा लागे पखेरी भो अब ।
साँझ पख बाँसघारीको बाटो हिँड्नै हुन्न
आवाज आउँछ छिटो जाउँ अँधेरी भो अब ।
विजयखर्क–१
खोटाङ, हाल कतार
(स्रोत : उज्यालो अनलाइन डट कम)
