~दिनेश अधिकारी~
-यो सुन हो
लिन्छौ?
-लिन्नँ।
-खेतमा धान उब्जाउन सकिन्छ
केही नगर्दा-
खेतमा घर बनाउन पनि सकिन्छ
केही नगर्दा-
बेचेरै पनि खेतसँग सम्पन्नता साट्न सकिन्छ
स्वीकार गर !
यो खेत तिम्रै भयो
-स्वीकार छैन।
-भैगो !
मन्दिरको गजुर
खोलाको कलकल
र, विहारको पवित्रता पनि तिमीलाई नै भयो
-चाहिँदैन।
-उसो भए भावुक रहेछौ
सुन्दरता चुलिएको सगरमाथा
र शरद्को फूलबारीसँग त लोभिँदा हौ नि तिमी पनि
-अहँ, लोभ लाग्दैन।
-यीबाहेक अर्थोक के हुन्छ त लोभ लाग्ने?
तिमी पागल रहेछौ
-खै ! तिमीले मान्छेको कुरा गर्यौन?
मलाई मान्छेबिनाको सम्पन्नता चाहिँदैन
मलाई मान्छे नहाँसेको सुन्दर हिमाल चाहिँदैन
मलाई मान्छेबिनाको धर्ती पनि चाहिँदैन
मलाई मान्छेबिरुद्धको मन्दिर पवित्रता पनि चाहिँदैन
