~वामदेव पण्डित~
सत्सठ्ठी अब छैन त्यो विगत भो ख्वाएर तीता कुरा ।
अठ्सठ्ठी अब आउँदै छ बलियो देखाउँदै पाखुरा ।।
पक्कै आउँछ संविधान रसिलो मिल्ने छ मीठो रस ।
सारा वर्ग खुसी हुने छ सबको प्यारो मणि पारस ।।१।।
हाम्रो देश अखण्ड बन्न उसले गर्ला बढी मद्दत ।
नेपाली मनमा सदैव रहला आदर्शको आदत ।।
राम्रो जागिरमा लगाउँछु भनी पैसा कमाइलिने ।
आफू हो भनी जाँचमा निडरले छोरी पठाइदिने ।।२।।
यस्तो काम गरी सभासद् बने निर्लज्ज नाजायज
निक्लेको नववर्षले सुमति दि बन्लान् कि जायज ।।
भ्रष्टाचार गरी थिची मुलुक यो सम्पत्ति थुप्य्राउने ।
थुपै्र मानिसमाथि न्याय कसिई गर्दै छ मुन्ट्याउने ।।३।।
गल्ती अघिका सुधार गरी दे प्यारो नयाँ वर्षले ।
निक्ली उज्ज्वल संविधान रसिला बाँचौँ सबै हर्षले ।।
बढ्दै गो महँगी समग्र जनको खाँदै छ है खप्पर ।
फाल्दे है अब लौ गरिकन कृपा डाँडो कर्टाई पर ।।४।।
राम्रो भन्नु यहाँ कुनै पनि कुरो सर्वत्र देखिन्न र ।
हाहाकार बढेर मूरि्छत बने सम्पूर्ण नारी नर ।।
गुम्यो होस हवास नष्ट गरी दे दाराहरू कष्टको ।
चाँडो दृष्टि पुगोस् यी विषयमा हाम्रो नयाँ वर्षको ।।५।।
नेताको मनभित्र भित्र छ धुलो हावा हुरी बादल ।
पार्टीमा अमिलो भएर रहँदा बन्दैन राम्रो दल ।।
ठूला ती दलमा छ रोग यसले रोगी बन्यो देश र ।
देला कि उनमा नयाँ दिवसले इच्छा सफा सुन्दर ।।६।।
सीता बुद्ध पवित्र जन्मस्थल यो सर्वोच्च नेपाल हो ।
ठूला मित्र प्रसिद्धबीच रहने आदर्शको ढाल हो ।।
यस्ताका जनता जनार्दन कठै बस्दै छ सङ्कटमा ।
स्थायी शान्ति बनोस् यो मुलुकमा प्यारो नयाँ वर्षमा ।।७।।
(स्रोत : घटना र विचार राष्टि्य साप्ताहिकको इन्द्रेणी वर्ष ९५)
