~युद्धप्रसाद मिश्र~
हाम्रा यी खेतबारी श्रम सलिल बगी हातले जोतिएका
केवल हामी डटेका सक्रिय कृषका प्यारले पोतिएका
हरबेलामा यसैको वरिपरि घुमने वीर हामी सिपाही
गर्छन् हाम्रा तँ जस्ता अथकित पहरा चोरको त्राही त्राही
हाम्रा हँस्या हथौडा अजर अमरमा वास्तविक तथ्य जागी
शान्ति सुस्थिर लेला त्यस बखतविषे मात्र तैंलाई लागी
के हामी जन्म पाई धरति बीच यहीं गर्न पाइन्न डेरा
हामी छैनौं सुतेका अब निमुख भई दूर जा हे लुटेरा
देखिनस् यो चलेको झुपडी झुपडीमा सन्सनीदार हावा
मर्यादा पार्न हाम्रो पतन अब वृथा गर्नु तैले त दावा
शक्तिसम्पन्न ज्यँदूा विमल चहकिलो सान्स्कृतिक अस्त्रधारी
हाम्रो धावा छ ऐले अरिगणहरूको सर्ब संहारकारी
ऐले हामी तँ देखी असह रगतले उम्दिएका घडा छौं
आफ्नो संरक्षतामा कठिनतम ठूला बज्रभन्दा कडा छौं
तेरो दुष्चारिताको विषय स्थिति सबै तोड्नलाई खडा छांै
जान्दैनस् यत्ति उक्ती पनि बहुमतका विघ्न हामी बडा छौ
