~वासुदेव अधिकारी~
छोयो कि पोल्यो
छाम्यो कि डाम्यो
निक्कै गुन छ सिस्नोको
लेकमा सिस्नो
बेँसीमा सिस्नो
गीतै गीतको गाथा छ सिस्नोको।
सिस्नो जति जाज्वल्यमान् भए पनि
सिस्नो जति सामर्थ्यवान् भए पनि
घरको दलिन बनाउन सकिँदैन सिस्नोबाट
थामहरू बनाउन सकिँदैन सिस्नोबाट।
डाम्न हुन्छ
तर्साउन हुन्छ
तर अडेस लाग्न हुँदैन
न सिन्काको गुन
न फरिकाको भर।
सिस्नो भयको मूल हो
भए केन्द्रबिन्दु होइन जीवनको
जीवन मायाँको पर्याय हो
ओतको अर्को पाटो हो
पर्यावरणको यो वीभत्सतामा
हामीले सिस्नो रोप्ने कि साल?
गोजीमा बारूद बोक्ने कि
अमलाको दाना?
(स्रोत : “लालीगुराँस” बिद्युतीय साहित्यिक पत्रिका – अङ्क ४, अप्रिल २०१०)
