~भरत बागलुङे~
म नारी
पुरुषहरूकी कमारी
जीवन भन्नुको अर्थ
यद्यपी हैन भने
म हारि रहेछु युग–युग भरी ।
आउ लोग्ने मान्छेहरू
म बैंश पोखेर
नाङ्गा सडकहरूमा
सर्वाङ्ग उत्तानो परिदिन्छु
अनियन्त्रित भोग मलाई
म दुखे पनि नदुखे झैँ सहीदिन्छु ।
भो पर्दैन मलाई पूजा गर्न
दुर्गा, महाकाली, सरस्वती भनेर
पर्दैन मलाई फकाउन
नाक, कान छेडी गहना झुण्ड्याउन
म निर्धी, अबला, निर्बल छु
पाइला–पाइलामा म हारिरहेछु ।
म मेशीन–छोरा जन्माइदिने
पुरुषको इच्छामा सर्वाङ्गिने
म दुखेर पनि रुन पाउँदिन
म स्वइच्छामा हाँस्न सक्दिन
आउ स्वागत छ हर घडी
ए ! लोग्ने मान्छेहरू
म तिम्रो आगमनलाई रोक्न सक्दिन ।
म नारी
पुरुषहरूकी कमारी
जीवन भन्नुको अर्थ
यद्यपी हैन भने
म हारि रहेछु युग–युग भरी ।
(स्रोत : Pustaksansar)
