~कला अनुरगी~
हामी ब्युँझेपछि
लाग्नेछ पारिलो घाम
ओभाउनेछ शीत
र सुनिनेछ चराहरूको गीत ।
रमाउँदै बालकहरू
पोल्न थाल्नेछन् बारीमा जिलौटा
आकाशतिर उडिरहेको
जिलौटाको धुवाँ हेर्दै हजुरआमाले
सम्झिनेछिन् अन्तिमपटक आफ्नो समय
र, आनन्दले आँखा चिम्लेर
आशिष दिनेछिन् नातिनातिनालाई ।
त्यही बिहानदेखि
फैलिनेछ पसिनाको सुगन्ध धर्तीभरी
उच्च हुनेछ यसको मोल
र, बन्द हुनेछ सपनाको व्यापार ।
सारा कुरुपता त
हाम्रा निन्द्राका सन्तान हुन्
हामी ब्युँझेको बिहान
असाध्यै सुन्दर हुनेछ संसार l
(स्रोत : रचनाकारको फसबुकबाट सभार )
