गजल : आभा छरेर भोलि

~अनन्त लम्साल~

ज्योती बनेर बस्नू आभा छरेर भोलि ।
चाहे म दूर जाऊँ सागर तरेर भोलि ॥

जीवन हुँदैछ कालो रातै छ आज साथी,
लाँदैछ चाँदनीको स्यूँदो भरेर भोलि ।

बिस्मात छैन कत्ति आयौ चुँडेर लायौ,
उस्तै गरेर मर्थेँ भुईँमा झरेर भोलि ।

ब्यर्थै म अन्ध बन्दै जोख्दो रहेछु प्राप्ति,
के नै छ जिन्दगीमा लाने मरेर भोलि ।

हेर्दै मलाई पागल भन्ने जमात आज ,
एक फेर हेर साँचो माया गरेर भोलि ॥

(स्रोत : Shabdahar )