~राजिन पनेरू~
प्रिय जुली
अतिथि देवो भवः
स्वागत छ तिमीलाई
बिच्छाएर हरियो गलैंचा तराईका फाँटहरुमा
छरेर शीतलता हिमाली झरनाहरुमा
तिम्रो पर्खाइमा छन् विल्कुलै तिम्ले नदेखेको
काँडेभ्याकुरका जोडीहरु
चखेवाका भाले–पोथीको लीला हेर्न
आऊ मेरो देशमा
सुन्दर, शान्त र विशाल परिवेशमा ।
म तिमीलाई बुद्धको क्रीडाभूमि देखाउनेछु
सतीदेवीको पीठको दर्शन गराउनेछु
गुन्द्रुक र ढिंडोमा
रोदीघरको आँगनमा
देउसी भैलो र सारंगीको धुनमा, जुनेली रातमा
सुनाउँला फाग र मालसिरीका कथाहरु
भारत, हुड्कोको तालमा ।
प्रिय जुली
कत्ति नभुली
हिमालचुलीको देशमा
तिमीलाई स्वागत छ
फेवा र रारा तिम्रो पर्खाइमा कुरिरहेछन्
खैंजडी र मुजुराहरु
बोकेर ठूले दाइ
सेल पकाएर साइँली दिदी पर्खिरहिछन्
एकैछिन्
तिम्रो यान्त्रिक सभ्यताको गन्ध छाडेर
बोकेर उमङ्ग
प्रिय सखे यता आए केही था पाए
बिमारी हुने चिन्ता नलिए
पाँचऔँले, सिल्टिमुर र घोडताप्डेको जरा घोटेर
ऐंसेलु र बादुलपातेको रसले
भोटे दाइको खलमा पिँधेर
पिलाउँला चौरी र भेडाको दूधसँगै
राखेर ऊनको गलैँचामा
सञ्चो बनौली
बनाएर हृष्टपुष्ट पठाऔँला तिम्रै थलमा
फर्कने बेला सुनाखरी र पलाँसको
थुङ्गाले रङ्गाएर लालीगुराँसले
तिम्रो खैरो केशमा
आङ्खनै देशमा आङ्खनै परिवेशमा
सुनाए तिम्रा सङ्गीहरुलाई मेरो निमन्त्रणा
सके आऊन् तिमीसँगै तिनीहरु पनि
यति भनी आजलाई यत्ति नै
बाँकी तिमीसँगको भेटमा
उही तिम्रो रोमियो
सगरमाथाको देशबाट ।
सौरपानी–२, गोरखा
हाल ः काठमाडौं
newvision.paneru@gmail.com
(स्रोत : सम्मोहन साहित्यिक पत्रिका)
