~कृष्ण बजगाईं~
दुई आइमाईले विवाह गरे ।
“आइमाईको विवाह ?”
हजूर पारपाचुके गरेर बसेका आइमाईले एक आपसमा विवाह गरे । अर्थात समलिङ्गी विवाह ।
“किन गरेको समलिङ्गी विवाह ?”
पत्रकारले अदालत अगाडि सोधे ।
“लोग्नेको शासन खप्नु भन्दा त आइमाई कै कमारी हुनु बेस ।” दुवैले एकै स्वरमा भने ।
वैवाहिक तथा ब्यावहारिक जीवनमा एकजनाले पुरुषको र अर्कीले स्त्रीको भूमिका त निभाउनै पर्दथ्यो । सोही क्रममा खटनपटन गर्दै आदेश दिँदा र जिम्मेवारी पुरा गर्दागर्दै त्यस मध्ये कि एक महिलामा क्रमशः पुरुष प्रकृति देखा पर्दै गयो । उसको पुरुष प्रकृति अर्कीलाई सह्य भएन । एक दिन उसले मुख खोलेरै भनी “यो लोग्ने भन्ने जात संसारका सबै उस्तै हुँदा रहेछन ।”
