~चट्याङ मास्टर~
मेरो शहरमा हरेक दिन, एक साइकलवाला आउँछ,
खाली बोतल, पुराना कागज, किन्न बोल लगाउँछ ।
हिजो साँझसम्म,
मेरो घरमा बोतल भरि थियो, म खाली थिएँ,
अनि रात पर्यो,
म भरि भएँ, बोतल खाली भयो ।
फेरि बिहान भयो,
बोतल खाली थियो, म पनि खाली थिएँ ।
फेरि त्यही साइकलवाला आयो,
खाली बोतल पुरानाकागज किन्न बोल लगायो ।
मैले सोधें–
किन खाली खालीबोतल किन्छौ तिमी ?
म पनि त खाली छु, कति मोल दिन्छौ तिमी ?
उसले भन्यो–
हामीलाई त खाली बोतल नैं चाहिन्छ
भरिएको बोतल चाहिँदैन ।
खाली बोतलमा नयाँ माल भर्न पाइन्छ,
भरिएको बोतलमा पाइँदैन ।
खाली बोतलको ठूलो गुण के छ भने हजुर
त्यसको माथि शिर्षस्थको बिर्को हुँदैन ।
त्यसैले–
खाली बोतलको मोल हुन्छ
तपाइको मोल हुँदैन ।
मैले भनेँ–
सायद तिमी ठीकै भन्छौ,
तर तिमी सधैं पुरानै कागज मात्र किन किन्छौ ?
मसँग नयाँ कागज पनि छ
नयाँ कागजको मोल कति दिन्छौ ?
उसले भन्यो–
हामीलाई त पुराना कागज मात्रै काम लाग्छ,
नया कागज त हामी सप्लाई गर्छौ,
सिंहदरवारमा ठूलो मांग छ
नयाँ कागज तपाईसग भए अहिले राख्नुहोस्
तपाईलाई संविधान लेख्न काम लाग्छ
तपाई संविधान लेखि सक्नुहोस्
अनि त्यो कागज हामीलाई काम लाग्छ ।
मेरो शहरमा हरेक दिन एक साइकलवाला आउँछ
खाली बोतल, पुराना कागज किन्न बोल लगाउँछ ।
(स्रोत : Ujyaaloonline.com)
