~कैलाश थापा /एस.के. सुवेदी~
ॐ तत्सत्, भैसी पुजाय नमोनम । भारत वर्षो नेपाल खण्डे भैंसी प्रसाद मः म । प्रजा-लोक-गणतन्त्र मन्त्र स्वाहा ! ॐ अहम् स्वार्थ नमाय नम, भैंसी प्रसाद मःम पिण्ड त्रिपनताम्, त्रिपनताम ।
श्री कान्तिपुरी सहरी क्षेत्राधिकार पेरिस डाँडा – कोटेश्वर क्षत्रै अखेडा आज्ञाकारी गणराज्याधिश संगठित जमात राज्यम् नाम घोसित माओल्याण्ड नमस्कार । इतिश्री बल्खुदरबार रातोघरका जमघट सदस्य अटाउने राज्यनाम लेनिनप्रान्त वा मार्क्स प्रादेशिक शरणम् । अथ ललितपुर क्षेत्राकारी निर्माणाधिन भवन काङग्रेसीराज गान्धीवादी जमात (राज्यम) गणराज्य गान्धीप्रदेश स्वागतः ।
ल अब मःम पिण्डो मुखमा हालौं र भैंसीको पुच्छरले आचमन गर्दै सभ्य अपसभ्य हुँदै हात जोडेर ह्याकुल्लो, कल्चौडो राजखानी हेर्ने र ताक्ने । अनि गिरीजावादी जिन्दावाद र एक हौ, भन्दै नारा लगाउनेले जे गरे पनि राम्रै राम्रो मात्र । अरु र्सवसाधारण हात जोडेर ॐ शान्ति शान्ति दुष्ट बिचार आत्मा गीरिजाओस् भन्दै प्रार्थना गर्ने ।
भैंसी पुजापछि पनि भैंसी नै हो । भैंसीको प्रसाद मः म, कान्तिपुरैको मात्र र्सवाधिक भोजन नभई अन्यत्र पनि त्यत्तिकै प्रख्यात छ । अझै पनि (भैंसी + प्रसाद + मम) = (भैंसी +प्रसाद + मम + दल) (भैंसी = प्रसाद + भैंसी) = (प्रसाद + मः म) यस्तो जोडजाडले भैंसी पुजाको भौतिकवादमा महत्त्व दर्शाउँछ । भैंसी पूजापछि तयार पारिने अनेकौं प्रकारहरु मध्ये राजखानी, हर्याकुल्ला, कल्चौंडो अनेकौं गण-अंगहरुको स्वाद आफ्नै ठाउँमा छन् । र पनि भैंसी प्रसाद मःम लगायत छोयला, कचिला, दायुकला भुटन, किमा आदि इत्यादीको स्वादले बिजुली पानीको कस्तो ओजनदार क्रान्ति होला ? त्यो त गोर्खाल्याण्ड जस्तै तर त्यस्तै गान्धीवादीहरुको राज्य गान्धीप्रदेश वा मार्क्सवादी भए मार्क्सप्रान्त र लेनिनवादीका लागि लेनिनगणराज्य तयार हुने रहेछन् । अनेकमा अर्को माओवादीको छुट्टै माओल्याण्ड-प्रदेश-प्रान्त अनेक भागमा भागबण्डाबाट प्रभावित वा तालिमप्राप्त भएका छम, त्यही गणराज्यमा शान्तिपूर्वक भजनकृतन गाएर दर्शन सिद्धान्त अनुसार आफ्नो परिचय दिन पाइने छन् ।
अमेरिकाबाट ओतप्रोत भएकालाई पनि बाराक ओवामावादी राज्य वा प्रान्त-प्रदेश निर्माण गराइदिन सकिनेछ । २१ औं शदाब्दीको सफलव्यक्ति जो वर्णाकार भएर पनि इराकका सद्दाम हुसेनलाई बली दिएर अफ्रिकी-एसिया मूल का जस्ता बाराक हुसेन ओवामा विश्वको शक्तिसम्पन्न मुलुकको राष्ट्रपति बनेका छन् । यता पनि उस्तै उस्तैको सक्कल नभए पनि नक्कलमा भैंसीपुजा भइरहेको र भैंसी प्रसाद मःम तयारी छ । किनकी आमुल परिवर्तनको बहानामा विभिन्न देशहरुको उदाहरण दिएर ६०१ जना सभासद जनप्रतिनिधिहरुले नपुगेर हरुवाहरुलाई राज्यसत्ता सुम्पदै विश्वकृतिमान अर्थात् नयाँ सिद्धान्तको सुरुआत भएको छ । आफू भित्ते राष्ट्रपति मै सिमित भए पनि राजखानीको स्वाद अर्कैले डकारेको सहँदै छटपटिनु पर्दो रहेछ ।
यहाँका प्रतिगामीहरुले गाइको पुजा गर्दै अहिलेसम्म भैंसीलाई जसरी राज्यशक्ति लगाएर उपेक्षित गरिदिए, त्यो मानवअधिकारको हनन भन्दा ठूलो पक्षपात थियो । अब हामिले आमूल परिवर्तन गरिदिएका छौं । आहाल बस्ने, नुहाई धुवाई चोखो हुने भैंसीलाई पाखा लगाई गाईपूजा अहिलेसम्म चलाई आएका थिए । भैंसीमाथि ठूलो अन्याय चलिरहेको हामीले बुझ्यौं । त्यसैले अनेक आन्दोलन क्रान्ति गर्दै भैंसीप्रसाद मः म प्रख्यात बनायौं । यो भैंसीको प्रसाद मः म बाट अनेक गण-खाद्य परिकारले अग्रगमन भएका हुन् । यस्तै हाम्रो दैनिक तन्त्र-मन्त्रको पुजापाठ अनुसार प्रजा-लोक-गण-जनतन्त्र मन्त्रले भारत वर्षे नेपालखण्डेमा अनेक राज्यबाट भैंसी प्रसाद मः म लगायतले चलिरहेछम् ।
आजसम्म भैंसीका सन्तानलाई यी सामन्तीहरुले जिउँदो छँदा दुध र मल अनी गाडा बयलगाडाको अग्रभागमा पारेर शोषण गरे । मातृत्वविहिन शिशुदेखिन बृद्धासम्मका भैंसी प्रसाद दुधको खुराकले तङ्ग्रिए । त्यही भैंसीका पाडापाडीले खान पाउनुपर्ने पहिलो अधिकार हरण गरेर भैंसी गोठालाहरुले जनताको हालतजस्तै बनाइदिएका थिए । अर्कोतर्फगाडा बयलगाडाको शक्तिस्रोत हुन् भन्ने श्रीकृष्णले अर्जुनलाई रथमा राखेर युद्धमैदानमा भिडाएको जस्तै खेतवारीमा जोताई आएका थिए । यता सहरबजारमा पनि दैनिक अग्रगमनको स्वरभाषाले कालोभैंसी बराबर भए पनि के के दर्शन सिद्धान्तका प्रखर विद्धान तयार भए । प्रभु वा मालिकको आज्ञा अनुसार चर्तिकला चलाउन सफल भएकै हो । त्यसैलाई मौलिकता दिएर नागरिक समाज तयार भएका छन् । यी यस्ता सबैलाई भैंसी प्रसाद मः मले बल पुर्याई आएकै छ ।
हुन त यमराजको बहान भैंसी कतिसम्मको ताकतदार रहेछ । त्यो ०४६-६६ कै अवधी अर्थात दुई दशक पार हुँदासम्म प्रजा-लोक-गण-तन्त्र मन्त्र उच्चारणले गाइको पुच्छर समाई बैतरणी पार गरेको सबैले भोगेकै हो । जसरी सानातिना खोलानाला नदीमा मिसिएपछि आफ्नो परिचय गुमाउँछन् । त्यस्तै त्यस्तै तिनदलीय भैंसी प्रसाद मःम जस्तै भएको छ । दलिय स्वार्थ अन्तरगत नपर्ला र पनि पारिवारिक पृष्टभूमि आफ्नै ठाउँमा छन् । कोही तल्लोमा वडा अध्यक्ष वा बैंकको ऋण मिनाह गराउन लागेका होलान् । अरुकोही मन्त्री अझ सबैलाई भुलाएर मुख्यमन्त्री हुन घात प्रतिघात चलिरहेकै हो । कोही गर्भनर पद उछिट्याउन लालायित थिए त कोही अख्तियार दुरुपयोग गरे पनि कारवाही नहुने पद, आदि इत्यादीमा भैंसी पुजापछि भैंसी प्रसाद मम जस्तो भैंसीवादीहरु लागेका छन् । जहाँ भैंसीको पुच्छरले आचमन गरेपछि जस्तोसुकै पनि नास हुने । लेखा, अख्तियार पाखा लाग्ने रहेछन् ।
गणतान्त्रिक-लोकतन्त्रको आडमा अरुलाई छाडेर आफ्नो छोराछोरी, सम्पत्ती बचाउँदै लोक-परलोकको जिम्मा लगाउँदै बैतरणी पार गर्न जातीय राज्यविभाजन गरेर भैंसीको पुच्छर समाई बैतरणी पार गर्नेहरु तछाड मछाडदिनको उच्चगतिमा चलिरहेछ । जसरी भैंसी पुजा गरेर दशा-ग्रह शान्ति गर्दै, जो अशान्तिको जड छ, थियो, राज्यसत्ताको लागि त्यसैले अशान्ति मच्चाई रहेछ । उसैलाई शान्तिको नोबेल पुरस्कार दिलाउन सिफारिस गर्न पछि परेनन् । जसरी भैंसी जस्तै कालो अन्धकारमय २४ घण्टाको एकदिन भएको छ । १२ घण्टा त लोडसेडिङले अरु सबैलाई अक्सिजन सिलिण्डर चाहिने अर्थात् उमेरको हदले गर्दा मृतअवस्थामा पुगेको जस्तै बनाइदिएछम् ।
अब हामी २१ सौं शताब्दीको महान् क्रान्तिकारी आन्दोलनकारी भएका छौं । साथमा वार्ताको लागि वार्ता र छलफल गर्न छलफल चलिरहेकै छन् । जनताले हराए पनि जनप्रनिधि हुन पाइने । सत्ताभत्ताको भागबण्डा लगाउँदै बन्द कोठामा आयातित मिष्ठानहरुले ताकत दिइरहेकै छ । साथमा भैंसी प्रसाद मःम सामेल हुने नै भै हाल्यो । यस्तैलाई मिलाउन उच्चस्तरीय षडयन्त्रको (संयन्त्र) व्यवस्था पनि भएकै छ । जति जनतालाई दुःख दिनसक्यो, सताउन सक्यो, त्यति नै योग्य हुन पाइने र नमरेसम्म सत्ताभत्ताको लागि योग्य पनि हुने । यस्तो महानकार्यको लागि नियम कानुन रितिरिवाज धर्म दर्शन सबैमा तिन दलीय राजनीति, त्यो पनि जातीयताको आधारमा चलिरहेछ । यस्तैमा पाउने र नपाउने बिच्चमा समर्थन विरोध चलिरहेकै छन् । विरोधीको आवाज विरोधमै सिमित नभई भैंसी प्रसाद मः म मा पुग्दा त्यतै बिलाउँछन् । पाएपछि पनि भागबण्डा लगाउनेहरुको गृहकार्य दैनिकी भएको छ । यता जनताहरु महंगी अभाव हत्याहिंसा अपहरण फिरौती त्यसमाथि सरकारी भ्रष्टाचार कमिशन तस्करी इत्यारीको राजनीति उद्योग सावित भएको छ । भैंसी प्रसाद मः म जस्तै मौलाएको छ । जति नै बधनियत बदमासी बदनामीनै बैधानिक भई लुट चलाउन छुट पाएकै छम् । यी सबै भैंसी पुजा पछि, त्यसैको पुच्छरले शुद्ध शान्ति पारिदिएको छ ।
अब भैंसीको पुच्छर समाएर आजको अवस्थामा पुग्दासम्म कालमोचन भएको छ । कस्को कति विल्लिवाँठ, धनसम्पत्ती स्वाहा पारियो ती सबैबाट मोक्ष मात्र होइन, भैंसी पुजापछि राजखानी, हर्याकुल्लो, कल्चौडोको लागि भयौं प्रतिगामी र सामन्तीहरुको एकै किल्लाबाट अवरोध थियो । हामी मिल्यौं र देशी विदेशी शक्ति समेत मिलाएर हरुवाहरु (जो जनताबाट तिरस्कृत तर दलगत हिंसाबले) र सञ्चार माध्यमलाई दुरुपयोग प्रयोग गर्दै सबैका सामु सामुहिक प्रदर्शन गरी सत्ताभत्ताको भावण्डा चलाउन सफल भएका छौं । जय होस् हाम्रो र साथै भैंसी प्रसाद मः मको गुणगान दैनिक चलिरहोस् । त्यसैको लागि जे गर्न गराउन तयार भएर लागेकाहरुलाई समेत धन्यवाद । हामीले जे बोल्छम्, जे गर्छम् यी सबै अग्रगामी र साथै क्रान्तिकारी हो । त्यो भन्दा परका सबै प्रतिगमी, सामन्ती देशी विदेशी दलाल हुन् । साम्राज्यवादी, विस्तारवादीका भरौटे मात्र हुन् । त्यसैले सालिक तोडफोड र तिनका नाम निशाना मेटाउन एक भई जातिय आधारमा लागेका छौ । आफ्नो स्वार्थ पूर्ती गर्ने र अरुलाई भाँडमा जाक्न एकभै लागम् ।
(स्रोत : Nepalplus)
