~शिवगोपाल रिसाल~
गाई हाम्रो पशुधन, गोठको शोभा गाई
गाईजस्तो अरू छैन गाउँघरलाई
गाई पाल्ने देश हाम्रो गाईलाई मान्छ
वर्षैपिच्छे तिहारमा गाईको पूजा हुन्छ
घाँसपात, कुँडो, पराल, भुस्सा यसले खान्छ
अरूभन्दा तागतिलो दूध यसले दिन्छ
दूधबाट दही बन्छ, दहीबाट घिउ
दूध, दही, घिउ खाँदा राम्रो हुन्छ जीउ
घर लिप्न, चोख्याउन गोबर यसले दिन्छ
खेतबारीमा हाल्ने मल गोबरबाट बन्छ
मर्दा-पर्दा, धर्म गर्दा गौदान गाईकै हुन्छ
गुइँठो पारेपछि गोबर बाल्न पनि हुन्छ
गाईका काम धेरै हुन्छन्, कामधेनु गाई
गाई आमा पनि भन्छौँ हामी गाईलाई
हामी गाईको माया गर्छौँ गाईका धेरै गुन
यो राष्ट्रिय जनावर नेपालको धन
(साभार: महेन्द्र माला कक्षा २)
