~सुधीर छेत्री~
सिलिकनका टापहरूले थर्किएर
आप्रावासी औंलाहरू कॉंप्छन्
तिहारका बाबरी फूलमाझ।
गोजीमा सिलिकनका कानेखुशीहरू
दिनभरि दही-चिउरा खान्छन्
अनि कसारका डल्लाजस्ता बटनहरू
रातो-पहेंलो बनी
मलाई मित्रताको सिग्नल दिइरहन्छन्।
हेल्लो सिलिकन !
तिमीले सकी-नसकी बोकेको विद्युत- तरङ्गबाट
केही धागाहरू पठाइदिनू
पहाड चढ्दै गरेका डोका-नाम्लाहरू
बिस्तारै सिलिकनमा अनुदित हुँदैगरेका कथा
म त्यही धागोमा बॉंधेर पठाइदिउँला।
देउसी-भैलोका एमपीथ्रीहरू सुनेर
कहिले नअघाउने डॉंडा-भञ्ज्याङ
आजभोलि कुन माइक्रोचिप्समा मुख जोतिरहेछ।
टर्रो सिलिकनको सुपारी चुस्नथालेपछि
खस्रो भएको आस्वादनको जिब्रोले
संस्कारका स्वादिला जङ्गली अमलाहरू
खाएनन् खाएनन् !
हिजाज
सिलिकनले मासु खान्छ
चैते दशैं काटेर भोग लाउँछ।
सिलिकनका ह्याकुला भएका नानी जन्मिरहेछन्।
सिलिकनकै दूध
सिलिकनकै मातृत्व र
सिलिकनकै पाठेघर।
हेल्लो सिलिकन
(स्रोत : अन्तर्जाल )
