~वासु शशी~
मेरो निमित्त यो संसार ठूलो छ
त्यसैले म एउटा घर बनाउँछु ।
यो सानो शरीरले
यत्रो विशालतालाई कसरी सहोस ।
यो एउटा मनले
यतिका सब जनासँग कसरी भ्याओस् ।
मसँग गिदी पनि
यो माथाभरि मात्रै छ ।
र सपना मेरो निद्रादेखि बाहिर जान सक्तैन-
ए उकुसमुकुस, ए उकुसमुकुस
तिमीलाई मृत्यु चाहिन्छ, मृत्यु चाहिन्छ !
किनभने तिमीले आफूबाट क्षमा नपाइ हुन
किनभने तिमीले आफूलाई क्षमा नदिइ हुन
तिमीले आत्म-हत्या गर्नैपर्छ !
तिमीले आत्म-हत्या गर्नैपर्छ ।
(स्रोत : वासु शशीको कवितासङ्ग्रह ‘यस्तो यौटा फूल चाहिन्छ’बाट साभार गरिएको )
