~प्रकाश सायमी~
बट्टामा थुनिएर
अँध्यारोमा लुकेर
लामबद्ध भएर
सलाम पर्खेर
कैद यातना सहेर बसेका
एउटै वेशमा
एउटै देशमा
एउटै मुद्रामा
एउटै मुद्दामा
सैन्यशक्ति जस्तै तथस्थ भएर बसेका
ई सलाई काँटीहरू
काठका हुन्
तर बिजुलीका पाठ हुन्
निर्जीव छन्
तर ज्योत र जाग्रत छन्
ननिभे पनि कथा छ
निभे पनि व्यथा छ
ई सलाईका काँटीहरू
धागो जस्तै उनिएर
आगो बोकेर बसेका
वीर क्रान्तिकारीजस्तै
हाडहरूको रूप लिएर
पहाड तोड्ने क्रममा
तैनाथ सशस्त्र सैनिकजस्तै
क्षेप्यास्त्र हो कि
अर्थशास्त्र हो कि
भ्रम बोकेर बसेका छन्
ई सलाईका काँटीहरू
जलेपछि
कोही इतिहासमा बन्छन्
कोही उपहास बन्छन्
