~वासु शशी~
रूख एक पल्ट निस्कन्छ धरतीबाट
र सदाका लागि बाहिर पर्छ !
पहिले पृथ्वीको भित्री तहलाई सकसक लाग्छ
बाहिर के भइरहेछ हेर्न !
सँगसँगै आफूलाई पनि
सबका बीच लगेर व्यक्त गर्न !
त्यो उत्सुकता उकुसमुकुसाउँछ
भित्रभित्रै कसिएर !
कहिलेकाहीँ खल्बलाउँछ
भुइँचालो बनेर !
त्यसको प्रकट रूप रूख
एक पल्ट देखापर्छ
र एक पल्ट ऊ जो निस्कन्छ
सदाका लागि बाहिर पर्छ !
(स्रोत : वासु शशीको कवितासङ्ग्रह ‘यस्तो यौटा फूल चाहिन्छ’बाट साभार गरिएको )
