~कृष्ण बाउसे~
भत्कुन पर्ने धराप भत्किसक्यो
फेरी पनि भत्काउने कुरा गर्नु बेकार छ
चर खनेर
नयाँ घरको जग राम्ररी उठाउनु पर्ने दिन
आइसक्यो
अझ पनि
मात्र टोल्हाएर समय बिताउनु बेकार छ ।
पल्टन बाँकी
केवल पल्टनै लागेका सालिकहरू छन्
पन्छन बाँकी
केवल खिइँदै गएका काँडे-तारहरू छन्
त्यसैले
अझ लड्छु भनेर पाखुरा सुर्कँदै बम्कनु
मंसिरमा बिजुली चम्कनु जत्तिकै बेकार छ
जे छ बाँकी अब
मात्र चिसो खरानी बँचेको छ यस घरको अँगेनोमा
अझै पनि
आफू रमिते बन्दै
अरू कसैले आगो सल्काइदेला भनेर
चिसो चुल्हो कुरिरहने हो भने
हाम्रो त्यस खोटो नियतलाई धिक्कार छ ।
हाम्रो त्यस खोटो दृष्टिलाई धिक्कार छ।
-कृष्ण बाउसे
-सुनसरी, हालः काठमाडौँ
(स्रोत : विश्वन्यूज डट कम)
