~कृष्ण बाउसे~
मैले एउटा सपना देखे
डाँडाका चुली – चुलीमा
गीत गाउँदैगरेको देखें।
एउटा हातमा उषाको लाली बोकेर
अर्को हातमा पुर्नेको जून च्यापेकी
भर्खरै फक्रेको फूलजस्तै देखिने
एउटी नव -युवतीलाई देखें।
मैले एउटा रचना देखें।
बिरानो ठाउमा उत्साहका साथ
साहसको रातो दोसल्ला ओढेर आउने बेहुलीजस्तै
कतैबाट कोही आउँदैगरेको देखें
उज्यालोले धुरीबाट चिहाउदैगरेको देखें ।
मैले एउटा सिर्जना देखें।
झुप्रा-झाप्रीले आपसमा माया लाउँदैगरेको देखें
मनले मनमा ठाउँपाउदै गरेको देखें।
ए समानताको सन्देश बाँड्दै आएको हावा !
तिमी आउन थालेदेखि
मैले मेरो गाउँको मुहारमा
परिवर्तनको सुन्दर लालीमा छाउँदैगरेको देखेँ ।
( २०३५, धरान / धरणी, २०४०)
पहिलो संस्करणमा “दृष्टि ” शीर्षकमा प्रकाशित
(स्रोत : रचनाकार स्वयंले ‘Kritisangraha@gmail.com‘ मा पठाईएको । )
