~डा.सोमबहादुर चातेला~
ना हि धेमालाइको चाअ्का थामे
ना हि धेमालाइको जाअ्का थामे
ना ह्रुता हि, ना लेता हि
ना केपाहा, ना दाङपाहा
राजनिति ते पाहि केलाइको वाराङगेलाइ
ना राज्यलिता, ना ताइको थामेता पहुँच
एला एसा बिस्लेसन पालाउ उदि बेलाको पाका
एला ते काम दोङ मालेखे, ओबालाइ दोसाङ ।
लाम्फाको काथा दोअ्का इन्तासो धिर्का
एलाको काथा दोअ्का पालिचालि गोइका
जुम्निको काथा दोअ्का आरोङ लोलि हि
उदिङ भासिङ एलाकोता जोर प्याइने, पाइने ।
आन्जि मापोह्रेलाउ बुङ नानि पोह्रेका हि
आन्जि मागिलाउ बुङ नानि धिर्पुका हि
आन्जि बुद्धि मापुगिपालाउ नानि सोचेका हि
पालि गोयाङ थेकापा होस लोका हि, याङ सम्पत्ति ।
एलाको जामालाइ चोमालाइ दामा भोःसु
कितिकितिकासो बाहार ओल्हेसु
जिदि थामेता हाइ हि उदिङ प्रयोग पासु
गेसा, टर्च, बिजुलि, मे, चेराक जोलाइसु ।
एला बुङ धेमालाइ डाक्टर मान्थु
एला बुङ धेमालाइ प्रोफेसर मान्थु
इस्का इस्काङ हिन्सा मान्थु
बानाइका जिम्मा नाङको, काङको को ना माको ?
हिकालाइ थामेता लागानि पाइने
स्वरोजगारि, बेबासाइता लागायाइने
ताइको जामालाइहेङ एल्का थामे चुम्पुलि
ओबालाइको भबिसेको फिनु हिपिलि ।
साँस्थासो पाइने, पार्टिसो पाइने
एनजिओसो दोका थेकापा पाइने
स्थानिय थामेता इस्तु काथाता पाइने
पालिको भासिङ एजुट ज्याइने ।
जामालाइ हिलि लोखे हाइपालि दोअ्तेङ
केलाइ दोफाङ मान्थु उत्तर हाइपालि
हिस्का कमजोरि आबास्थाता हिनाहि केलाइ
बुद्धिजिबिगेलाइ बानायाइने एलोङ सान्जाल ।
प्लस टु, ब्याचलर पाका जामालाइ हि
थामे थामेता कुह्र्याइने, तोल्ह्याइने
बेलाको माग आन्सार सोच्याइने, पाइने
ना का माको, केलाइ धेमालाइ ज्याइने ।
डा.सोमबहादुर चातेला धिमाल
जोरपाटी, काठमान्डु
ओघन ६, २०७४ ।
(स्रोत : धिमाल डट कम)
