~जीर्ण भागेदार~ 
छन्द : स्रग्विणी
फूलझै फुल्दिने धानझै झुल्दिने
लाखमा चम्किने लाखमै खुल्दिने ।
जूनझै बल्दिने चाँदनी पोख्दिने
बाँसुरी बज्दिने दीलमा बोक्दिने ॥
ढल्किदै पाइला चाल्दिने चालले
पस्किने वैँश त्यो प्रेमको तालले ।
मच्किने कम्मरै मच्किदा मस्किने
मातले मात्तिदा होसमा झस्किने ॥
क्या मिठो हेर्दिने मोहनी लाउने
क्या छिटो जिस्किने छेउमै आउने ।
लोभिने जीउ त्यो भागभागै अहो
वैँश नै स्वादिलो रागरागै अहो !!
—ओखलढुङ्गा
