~जीर्ण भागेदार~ 
हेप्ने र धुत्ने सब काम देख्छु
अश्लील बोल्ने सब राम देख्छु
अर्ती नदेऊ, किन आज मान्छु
कौडा पछारी वनवास जान्छु ।
प्रगत्ति देखी थुक झार्नु झारे
घाऊ बनाई चुक हाल्नु हाले
दुख्दैछ छाती मुटुनेरि बान्छु
कौडा पछारी वनवास जान्छु ।
मागेर खाने अति धेर भाछन्
बाँडेर खाने कति थोर भाछन्
यस्मै छ बेमेल् अति रोष ठान्छु
कौडा पछारी वनवास जान्छु ।
अल्छे र तीघ्रे अब न्याय खोज
आफू रमाई गर नित्य मोज
रक्सी, चुरोटै म त जे नि खान्छु
कौडा पछारी वनवास जान्छु ।
बोलेर के—के डर, त्रास देऊ
ए ज्यानमारा ! तब ज्यान लेऊ
आफैँ बसेरै जब दाउ हान्छु
कौडा पछारी वनवास जान्छु ।
मारेर कोही तर मर्छ भन्छौ
रोपे, सुकेको थुर सर्छ भन्छौ
बाँचे त साथी सय ठाउँ छान्छु
कौडा पछारी वनवास जान्छु ।
—ओखलढुङ्गा
