~जीर्ण भागेदार~ 
छन्द : चौबोला
चिठ्ठी मात्रै लेखेको छु
भेटघाटै भा’को छैन ।
कस्ती होली थाहा छैन
फोटो पनि पा’को छैन ॥
देखेजस्तै लाग्दो रै’छ
नदेखे नि उसलाई त ।
छेउमै भएजस्तो हुन्छ
नभेटे नि उसलाई त ॥
मेरा आँखा झिम्झिमाउँछन्
अनि उल्टोपाल्टो देख्छु।
मेरा हातै लर्खराउँछन्
आँसु झार्दै चिठी लेख्छु ॥
देउरालीमा बोलाउँथेँ
विपनीमा आउने भए।
भेट्ने साथै ‘मोरी’ भन्थेँ
सपनीमा पाउने भए ॥
कहिलेकाहीँ यस्तो लाग्छ
माया गर्छु भनिदिऊँ कि ।
एउटा जीवन अर्पिएर
सधैँ प्रेमी बनिदिऊँ कि ॥
हेर्दाहेर्दै माया लाग्यो
नपत्याउँदो जादु गरी ।
कस्ती राम्री, दामी होली
कल्पनाकी मेरी परी ॥
—ओखलढुङ्गा
