~डम्बर धिमाल ‘प्रकृति’~
आदिम युगको
सताब्दिको पुराना काथा
भूमि दोसाङ सिर्जा जेङ्का
मानव सभ्यता उन्ठुँइ युगको
पुर्खाको पुराना काथा
सिकार घाका, हाँया माङ्का
जिवन चक्र परिराउ
नाङ्घाङ जिन्दगि बिति पाका
पुराना काथा खिनिं पाघाखे ।
झारबारि सिकार घालि हानिलाउ
तोहे कुर्हाइलि हानिलाउ
मुसार भोवलि हानिलाउ
पिंइ ल्हाफा पेलि हानिलाउ
चुङ्सार पेलि हानिलाउ
असोङ आवाइतेङ गाङ्घाउरा
लोकोतो वोन युम्फि चातेङ
झेम्पाङ में पोन्धो एमतेङ
सिङ र्हुता थारान्जा बानाइतेङ
बासाहिका,
पुराना काथा खिनिं पाघाखे ।
लाधिका राम्धिका म्हाधिका
सत्यजुगको मानिल्का काथा
फोम पातेङ, पातेङ
खोदाइतेङ, खोदाइतेङ दोघाखे
उमेरता बिति पाका
आदिम युगको काथा खिनिं पाघाखे ।
लोका सताब्दिको काथाता
ताइ समुदायको काथा
ताइ सन्तोतिको काथा
परिवर्तनको काथा
हेलाउ बुङ मापाहि
पुराना काथा बाहेक,
एला बुङ हाँसु हेलाउ पाङ्ला
आजु आजाइं केलाइ परिवर्तन
आबा आमाइ नेलाइ परिवर्तन
जेङ्सु जेङ्लि गोयाङ पातेङ ।
डम्बर धिमाल ( प्राकृति )
नपा. उर्लाबारी-८ मोरङ दुर्गापुरी मेहरी चोक ।
हाल: बहराइन ।
(स्रोत : धिमाल डट कम)
