~गोविन्दराज विनोदी~
छन् काम नै यी न त कामजस्ता
छन् नाम नै यी न त नामजस्ता
छन् राम नै यी न त रामजस्ता
छन् जो सबै नै बदनामजस्ता
बिहानमा छैन नयाँ बिहानी
छन् रातजस्ता दिनका कहानी
यो चेतना कत्ति सचेत छैन
यो प्राप्ति हाम्रो समवेत छैन
यो देशमा सुन्दर देश छैन
निर्धक्क बाँच्ने परिवेश छैन
पीडाबिना शान्त निमेष छैन
संक्रान्तिको अर्थ विशेष छैन
खै बन्धुमा बान्धव भाव छैन
मान्छेसितै मानव भाव छैन
यो मौनता वास्तव चूप छैन
मैभित्र आफ्नो प्रतिरूप छैन
