~डा.सोमबहादुर चातेला~
लेःलि दोकालाइ लेःकाताङ नाल्पाइने
ताइ धरमकरम पहिचान नाल्पाइने ।
मास्टरगेलाइ देरातोम्पा ल्होपाइने
चेताना, पहिचान, इतिहास नाल्पाइने
लेख्याइने, ओल्हेपाइने, देरा तोल्ह्याइने ।
हाले चोइकालाइ ताइ काम पाइने
देरातोम्पा एजुट जेङतेङ आगायाइने ।
ताइ धरमकरम मालाअ्ताइने, पाइने ।
पोह्रेकालाइ नावा नावा काथा भोःकाइने
म्होन्हाका पहिचान, संस्कृति उदालाइने
थेसिस रो फिल्डवर्कता कामगेलाइ पाइने
ताइ जाति रो संस्कृति लेख्याइने, बान्चेपाइने ।
सिपकाला गिका वाराङबेराङ
नावा धानाधानिहेङ पुर्ना काथा धिर्पाइने
गिका काथागेलाइ पुस्तान्तरन पाइने ।
जुबे आमाइगेलाइ लाम्फाको कालासिप
धानिगेलाइहेङ धिर्पाइने, नाल्पाइने ।
ओझा, धामिगेलाइ देरातोम्पा रेम्फा ताअ्ताइने
दिरराङगेलाइहेङ मानिपाइने
देरातोम्पाको रक्छ्या पाइने
पुर्ना गुनको काथागेलाइ मिलिका थेकापा धिर्पाइने
ओसेरेपोइति बानाइका, लागाइका धिर्पाइने, नाल्पाइने ।
जामालाइ चोमालाइ आबाआमाइको दोअ्का साअ्ताइने
बेलाताङ रेम्का साँस्कार संस्कृति धिराइने
एल्का बानि बानायाइने, रेम्का काम पाइने, आगायाइने ।
धानाधानिगेलाइ ल्होकाइने, जोमाइने
छलफल पाइने, योजाना बानायाइने
एक्लाङ माको हुडडाताङ काम पाइने
धिमालाइहेङ नाल्पातेङ ताइ पहिचान बानायाइने
ल्होकाइने, पालि गोइका पाइने
मान्हुताइने, दोदोफाङ आगायाइने ।
नेतागेलाइ राजनितिसो नाल्पाइने
देरातोम्पा ल्होपाइने
बिकास पाइने, पहुँच बानाइप्याइने ।
सामाजसेवा पाकालाइ देरातोम्पा
एल्का बानायाइने
पालि गोइका कामगेलाइ ल्होपाइने ।
लेखकगेलाइ इतिहास, संस्कृति
जिन्दागिको काथाबेथा लेखिप्याइने ।
हासु हासु हिदि थामेसो पालि द्वाङ
पाइने, ल्होपाइने, नाल्पाइने, माजिमाइने
बेला याङ, केलाइ मापानु हासु पाङ ?
बेला याङ नाल्पाइने, पहिचान बानायाइने ।
बाखिन्खा ।
डा.सोमबहादुर चातेला धिमाल
जोरपाटी, काठमान्डु
(स्रोत : धिमाल डट कम)
